Halogjenuret organike

Halogjenuret organike janë komponime organike, të cilat përveç karbonit dhe hidrogjenit, përmbajnë edhe elemente halogjene. Ato gjejnë përdorim të gjerë në industri dhe në lëmenjë të tjerë. Klormetani dhe haloalkanet e tjera lirohen si gazra vullkanike.

Varësisht nga struktura e vargut karbonik, ekzistojnë tri lloje të halogjenureve organike.Nëse atomi halogjen është i lidhur për vargun karbonik të alkaneve, komponimi quhet halogjenoalkan ose alkil halogjenur.Formula e përgjithshme e halogjenalkaneve është R-X (X=-F,-Cl,-Br ose -J).Në rastin kur atomi halogjen është i lidhur për karbonin e lidhjes dyfishe të vargut karbonik të alkaneve, komponimi quhet halogjeno alken ose alkenil halogjenur.Nëse atomi halogjen është i lidhur drejtpërdrejt për karbonin e unazës aromatike,komponimi është aril halogjenur ose halogjenioaren.