Mjeshtër i madh (shah)
Titulli Mjeshtër i Madh në shah u jepet shahistëve të shquar të nivelit botëror nga Federata Ndërkombëtare e Shahut (FIDE). Ky titull, i cili është më i larti në botën e shahut, përfaqëson një arritje të lartë në renditjen shahistike. Mbi të qëndron vetëm titulli i kampionit botëror, i cili po ashtu fitohet prej një shahisti që mban titullin e mjeshtrit të madh.
Ky është një titull që mbetet i vlefshëm përjetë. Në literaturën shahistike, Mjeshtri i Madh shpesh përmendet me shkurtesën GM (Grandmaster) ose IGM (International Grandmaster, Mjeshtër i Madh Ndërkombëtar), në dallim nga titujt e tjerë si FM (Mjeshtër FIDE) dhe IM (Mjeshtër Ndërkombëtar).
Shumica dërrmuese e mjeshtërve të mëdhenj janë meshkuj, megjithatë deri në vitin 2024, 42 gra kanë marrë titullin GM nga totali i rreth 2000 mjeshtërve të mëdhenj. Gjithashtu ekziston edhe një titull tjetër, ai i Mjeshtres së Madhe për Gra (WGM), i cili ka kërkesa më të ulëta dhe u jepet vetëm femrave.