Shaban Meti
Shaban Mehmet Meti (10 janar 1929, Tivar - 1999?) ka qenë një infermier shqiptar nga Mali i Zi.[1]
Biografia Redakto
Shaban Mehmet Meti u lind më 10.1.1929 në Tivar. Pak vite pas lufte vjen në Shqipëri dhe më 1965 mori shtetësinë shqiptare. Deri në vitin 1957 kishte jetuar në Tiranë e më pas ishte vendosur me punë si nëpunës infermier në spitalin e Beratit. Nga jetesa e keqe dhe diskriminimi kërkon të riatdhesohet sepse regjimi komunist kalonte për nga barbaria çdo lloj pushtuesi. Kërkesa për riatdhesim, është interpretuar me karakter agjenturor. U arrestua më 25.2.1979, në kohën kur ishte baba i 6 fëmijëve. U akuzua me dy akuza të rënda, nenet 47/g (tradhti ndaj atdheut) dhe 55/1 (agjitacion e propagandë) të Kodit Penal. Midis të tjerash në vendimin e gjykatës thuhet:
“I pandehur është shprehur për gjendjen gjoja të vështirë ekonomike të keqe të masave punonjëse që sipas tij gjoja vuajnë për bukën e gojës, se gjoja në Shqipëri nuk ka demokraci, por vetëm dhunë e ashpërsim të luftës në klasave, se gjoja shtetasit jugosllavë si emigrantë nuk trajtohen mirë, se Shqipëria me prishjen e marrëdhënieve me BS-në e Kinën revizioniste mbeti vetëm, etj, biseda këto të bëra prej tij për të shprehur urrejtjen ndaj sistemit socialist e diktaturës së proletariatit në Shqipëri”.
Gjykata e Rrethit Berat e drejtuar nga Irakli Puka, me pjesëmarrjen e prokurorit Stiliano Bandilli, me vendimin nr.94, datë 17.7.1979, e deklaroi fajtor duke dhënë një vendim të egër me 25 vjet burgim. Shabani vuajti 12 vjet e 20 ditë burgim. U lirua më 17.3.1991, në bazë të dekretit nr.7471, datë 12.3.1991 të Presidiumit të Kuvendit Popullor (nr.124 i listës).[2]
Shih edhe Redakto
Referime Redakto
- ^ Dervishi, Kastriot. "1979/Dënimi i ashpër, 25 vjet burg për shqiptarin nga Tivari". 55news.al. Marrë më 2024-03-29.
- ^ Instituti i Studimit të Krimeve të Komunizmit (2018-03-10). "Fjalori Enciklopedik i Viktimave të Terrorit Komunist". kujto.al | Online Archive of Victims of Communism in Albania. Tiranë. Marrë më 2024-03-29.