Éric Rohmer

Jean Marie Maurice Schérer i njohur prej pseudonimit artistik Éric Rohmer (Tulle, Francë, 20 mars 1920-Paris, 11 janar 2010), ka qenë një regjisor, kritik filmi, gazetar, romancier, skenarist dhe profesor francez.

Éric Rohmeri në Kinematekën franceze në vitin 2004

Rohmeri ka qenë më i moshuari i kineastëve të Valës së Re franceze (La Nouvelle Vague) të fund-viteve 50. Ai prodhoi dy cikle filmash--Gjashtë rrëfenja morale (Six contes moraux) dhe Rrëfenja të katër stinëve (Contes des quatres saisons), dy përshtatje pjesësh letrare në film, dhe një film historik, Persevali gal (Perceval le Gaullois).

Tre prej filmave të ciklit të tij moral, Nata ime tek Modi (Ma nuit chez Maude), Gjuri i Klerës (Le genoux de Claire) dhe Dashuria pasdite (L'amour l'apres-midi) kanë qenë ndër filmat më të diskutuar të viteve 60-70 dhe kanë fituar atributet e fimit klasik.

Rohmeri njihet për stil të veçantë—personazhet e tij angazhohen shpesh në biseda të gjata 'të pastrukturuara' dhe në dukje shpesh pa lidhje me fabulën e filmit. Gjithashtu, ai njihej edhe si regjisor që arriti të bëhej i pasur me të ardhurat nga filmat e tij, sepse pavarësisht se nuk ishin blockbusters, buxheti i tyre ishte gjithashtu shumë i ulët gjë që i nxirrte ato sipërmarrje me fitim.

Jean Douchet, një përfaqësues tjetër i Valës së Re, e pati quajtur Rohmerin romancier të shekullit të tetëmbëdhjetë të sjellë në kohën e kinematografisë.