Abdylatif Fusha
Abdylatif Ali Fusha ka qenë doktor i mjekësisë, kardiolog dhe profesor universitar nga Podujeva.
Biografia Redakto
Abdylatif (Ali) Fusha ka lindur më 23 korrik 1931 në Podujevë në një familje përparimtare, të njohur për tradita patriotike dhe arsimdashëse. Shkollën fillore e filloi në gjuhën serbe, ndërsa klasën e katërt dhe të pestë e kreu në gjuhën shqipe në kohën e Shqipërisë.
Në vitin 1943/44 kreu vitin e parë në Shkollën Normale “Sami Frashëri” në Prishtinë. Pas një viti pauzë, shkollën e vazhdoi në vitin 1945, për ta kryer në vitin 1950/51. Më pastaj u punësua në shkollën tetëvjeçare në Orllan të Podujevës ku punoi vetëm një vit, meqë në fund të vitit shkollor i kishin lëshuar vendimin për largim nga puna me arsyetimin se familja e tij ishte një familje armiqësore dhe, në të njëjtën kohë, edhe ky cilësohej e konsiderohej si i tillë dhe i papërshtatshëm për regjimin e atëhershëm komunist për të edukuar brezin e ri.
Prandaj, në vitin shkollor 1953/54 u regjistrua në Fakultetin e Mjekësisë në Beograd, por edhe këtu organet e sigurimit ndërhyn dhe e larguan nga konvikti. Megjithatë, edhe përkundër kushteve mjaft të vështira, në vitin 1962 e kreu me sukses të lartë Fakultetin e Mjekësisë (gjithsej XII semestra).
Pas hapjes se Fakultetit të Mjekësisë në Prishtinë, ishte asistenti i parë për lëndën e mjekësisë interne. Më 1973/74 ka kryer dy semestra në studimet pasuniversitare në Zagreb, ndërsa magjistraturën e mbrojti më 25.07.1975. Gjatë gjithë kohës së pastajme, paralelisht ka kryer punët në Klinikën interne edhe ato në procesin edukativ – arsimor – shkencor në Fakultetin e Mjekësisë.[1]