Albena Reshitaj
Dr. Albena Refki Reshitaj (9 prill 1979) është një stomatologe, profesoreshë dhe politikane e njohur në Kosovë, e angazhuar në fushën e mjekësisë, kërkimit shkencor, dhe veprimtarisë publike. [1]
Biografia
RedaktoAlbena ka përfunduar studimet për Stomatologji në Fakultetin e Mjekësisë në Universitetin e Prishtinës në vitin 2006, ndërsa specializimin në Ortodonci e ka kryer në Universitetin e Mjekësisë në Vjenë më 2010. Në vitin 2014, përfundoi doktoratën në Universitetin e Tiranës, duke marrë titullin Doktor Shkence në Patologji Oro-Maxillo-Faciale.
Reshitaj gjithashtu ka përfunduar edhe studimet për Dramaturgji në Fakultetin e Arteve të Universitetit të Prishtinës në vitin 2008. Që nga viti 2007, ajo është mësimdhënëse në Fakultetin e Mjekësisë në Prishtinë, ku udhëheq Departamentin e Ortodoncisë dhe është Shefe e Katedrës për Paradontologji, Mjekësi Orale dhe Ortodonci. Ajo është Kryetare e Shoqatës së Ortodoncisë dhe e Ortopedisë Dentofaciale të Kosovës, anëtare e disa organizatave ndërkombëtare të mësimdhënësve të ortodoncisë dhe pjesëmarrëse aktive në qendrat kërkimore të Kosovës.[2]
Në fushën publike, Albena Reshitaj ka mbajtur pozita të rëndësishme politike dhe sociale. Ajo ka shërbyer si Deputete në Kuvendin e Kosovës dhe ka qenë Ministre e Mjedisit dhe Planifikimit Hapësinor. Në Kuvend, ka drejtuar Komisionin Parlamentar për Shëndetësi dhe Mirëqenie Sociale dhe Këshillin për Zhvillim të Qëndrueshëm, duke kontribuar gjithashtu në Komisionin për Arsim dhe atë për Mjedis. Për një periudhë të shkurtër, ka punuar si Këshilltare e Kryeministrit të Kosovës për çështje mjedisore.
Përveç angazhimit të saj në politikë, Reshitaj është autore e dhjetëra punimeve shkencore dhe bashkautore e veprave profesionale dhe letrare. Në fillimet e karrierës, ka punuar edhe si gazetare për gazetat “Pulsi” dhe “Zëri” dhe ka qenë aktive në ndihmën humanitare për Kryqin e Kuq Belg në periudhën 2002–2003. Kontributet e saj të shumta përfshijnë pjesëmarrje në forume ndërkombëtare, ku ka përfaqësuar fushën e saj dhe ka kontribuar në zhvillimin e shkencës në Kosovë.[3]
Referime
Redakto- ^ Mustafa Ibrahimi (red.) Instituti Alb-Shkenca ndër vite 2002-2023 (Monografi), fq. 65, ISBN 9789951518208
- ^ "Universiteti i Prishtinës". staff.uni-pr.edu. Marrë më 2024-11-06.
- ^ MMPH. "Biografia" (PDF). www.mmph-rks.org. Arkivuar nga origjinali (PDF) më 15 dhjetor 2017. Marrë më 13 mars 2018.