Fjala kyçe (programim)

Në programimin kompjuterik, fjala kyçe paraqet një fjalë identifikuese që ka një domethënie të veçantë brenda një gjuhe programuese. Në shumicën e gjuhëve programuese si C, C++ dhe Java, fjalët kyçe janë të rezervuara, ku kjo do të thotë që në këto gjuhë programorët nuk e kanë të lejuar që t'i shfrytëzojnë këto fjalë për emërtimin e variablave apo funksioneve. Duhet veçuar që fjalët kyçe identifikohen nga përpiluesi si pjesë e sintaksës të gjuhës programuese. Ndër fjalët kyçe më të shpeshta në gjuhët programuese janë:

• if, then dhe else që shfrytëzohen për vlerësime në bazë të kontrollit të rrjedhshmërisë së programit.
• for, while dhe do që shfrytëzohen për ekzekutime të përsëritura të pjesëve të programit.
• return i cili shfrytëzohet për dalje nga funksioni, dhe vazhdimin e ekzekutimit të programit menjëherë pas pikës ku është thirrur funksioni në fjalë.

Pamje nga theksimi i fjalëve kyçe me anë të ngjyrës të kaltërt në gjuhën programuese Java

Varësisht nga ambienti punues i programorit, fjalët kyçe theksohen me ngjyrë të veçantë që i bën të dallohen nga pjesët tjera të programit. Theksimi i fjalëve kyçe paraqet edhe një avantazh kur programori bën gabime të rastësishme në shkrimin e tyre, me ç'rast fjala kyçe nuk theksohet me ngjyrë dhe gabimi vërehet.