Konferenca Gjyqësore Kombëtare

Konferenca Gjyqësore Kombëtare (K.Gj.K.) është mbledhja e të gjithë gjyqtarëve të gjykatave të shkallës së parë, gjyqtarëve të gjykatave të apelit dhe gjyqtarëve të Gjykatës së Lartë të Republikës së Shqipërisë. Kushtetuta dhe ligji nr. 77/2012 i ka caktuar Konferencës Gjyqësore Kombëtare një pozitë të rëndësishme institucionale brenda sistemit të drejtësisë, duke qënë një instrument i rëndësishëm në forcimin dhe të mbrojtjen e pavarësisë të pushtetit gjyqësor. Konferenca Gjyqësore Kombëtare, sipas nenit 147/1 të Kushtetutës, ka kompetencën për të zgjedhur nëntë gjyqtarë të të gjitha niveleve në Këshillin e Lartë të Drejtësisë.

Konferenca Gjyqësore Kombëtare
Krijuar më:	1998
Vendodhja:	Tiranë
Kryetar:	Xhezair Zaganjori
Faqja zyrtare:	www.kgjk.al

Anëtarësia

Konferenca është një organ shtetëror i pavarur dhe vetërregullues, i cili përbehet nga mbledhja e të gjithë gjyqtarëve të Gjykatave shqiptare. Në të marrin pjesë gjithashtu edhe gjyqtarët që shërbejnë në strukturat e tjera shtetërore, për aq kohë sa ruajnë statusin e gjyqtarit.

Organizimi

Kryetar i KGJK-së është Kryetari i Gjykatës së Lartë të Republikës së Shqipërisë.

Ndërsa ligji Nr. 77 / 2012 “Për organizimin dhe funksionimin e Konferencës Gjyqësore Kombëtare” ka përcaktuar mënyrën e organizmit, funksionimit, kompetencat dhe organet drejtuese të Konferencës.

Sipas nenit 3 të ligjit nr. 77/2012, Konferenca ushtron kompetencat e mëposhtme:

• zgjedh anëtarët e Këshillit të Lartë të Drejtësisë;
• mbron dhe promovon pavarësinë e pushtetit gjyqësor;
• diskuton për drejtimet kryesore të veprimtarisë së gjykatave;
• paraqet rekomandime tek autoritetet përkatëse shtetërore për një administrim të paanshëm dhe efikas të gjykatave të Shqipërisë;
• paraqet rekomandime për përmirësimin e kuadrit ligjor dhe institucional të pushtetit gjyqësor.

Lidhje të jashtme

• Faqja zyrtare e K.Gj.K.