Energjia kinetike

Energjia kinetike është aftësia e trupave që të kryejnë punë për shkak se kanë një shpejtësi të caktuar. Për ta llogaritur energjinë kinetike të trupit me masën $\,m$, i cili lëviz me shpejtësi $\,v$, bëhet llogaritja e punës, e cila nevojitet që forca $\,F$ ta nxitojë trupin në ndonjë rrugë nga gjendja e qetësisë deri në gjendjen me shpejtësi $\,v$. Pra, madhësia e energjisë kinetike $\,E_{k}$ është e barabartë me punën e cila është kryer në mënyrë që trupi ta ketë fituar shpejtësinë $\,v$. Ajo punë është:

$\,A=Fs$

Meqenëse forca është konstante, do të jetë $\,F=ma$, kurse lëvizja do të jetë njëtrajtësisht e nxetuar, përkatësisht rruga është

$\,s={\frac {1}{2}}at^{2},$

atëherë ekuacioni për punën mekanike do të jetë:

$\,A=ma\cdot {\frac {1}{2}}at^{2}={\frac {1}{2}}ma^{2}t^{2},$

dhe meqenëse është $\,v=at$, atëherë energjia kinetike do të jetë:

$\,A=E_{k}={\frac {1}{2}}mv^{2}.$