The New York Times

The New York Times (NYT) është një gazetë e përditshme amerikane me seli në Nju Jork Siti. The New York Times mbulon ngjarje vendase, kombëtare, dhe ndërkombëtare, si dhe boton kolumna opinioni, kronika hulumtuese, dhe vlerësime kritike për kulturë. Si një ndër gazetat më të vjetra të Shteteve të Bashkuara, ajo konsiderohet gazetë autoritare dhe ndër më të besueshmet. Që prej 2023, The New York Times është gazeta e dytë më e madhe për nga qarkullimi i letrës në SHBA, me 296,330 abonentë të saj. NYT i ka 8.83 milionë abonentë në internet, numri më i madh mes të gjithë gazetave në SHBA. NYT botohet nga ndërmarrja mbajtëse The New York Times Company; prej 1896, kompania u drejtua nga familja Ochs-Sulzberger, kryetari dhe botuesi i të cilit është A. G. Sulzberger. Selia e gazetës është tek Ndërtesa New York Times në qendër të Manhattanit.

Ballina e "The New York Times". Botimi më 11 shtator 2002.

NYT u themelua si gazeta konservatore New-York Daily Times në vitin 1851, dhe arriti njohje kombëtare në vitet 1870 me mbulimin agresiv të politikanit të korruptuar William M. Tweed. Pas krizës ekonomike të vitit 1893, botuesi i gazetës Chattanooga Times, Adolph Ochs, fitoi aksione kontrolluese në kompani. Më 1935, Ochs u pasua nga kunati i vet, Arthur Hays Sulzberger, që e inkuadroi gazetën edhe në lajme rreth Evropës. Kunati i Sulzbergerit, Arthur Ochs, u bë botues në vitin 1963, duke u përshtatur me industrinë gazetareske në zhvillim dhe duke sjellur ndryshime radikale. The New York Times u përfshi në lëndën monumentale të Gjykatës Supreme në vitin 1964, New York Times Co. v. Sullivan, që kufizoi aftësinë e zyrtarëve politikë për të paditur mediat për shpifje.