Pasivizimi i adresave të shqiptarëve në Kosovën Lindore nga Serbia
Raportet mes qeverisë serbe dhe shqiptarëve në Kosovën Lindore vazhdojnë të jenë armiqësore, pasi Serbia ka nisur një fushatë pasivizimi të adresave të banimit dhe dokumenteve ndaj shqiptarëve në Preshevë Bujanoc dhe Medvegjë.
Deklarata publike nga palë të ndryshme
Redakto- Me 31 korrik 2021, kryetari i Këshillit Kombëtar Shqiptar në Serbi, Ragmi Mustafi shprehet se kryetari Vuçiq është armiqësor ndaj komunitetit shqiptar në Kosovën Lindore. Sipas tij, ky diskriminim dhe spastrim etnik tregohet nëpërmjet procesit të pasivizimit të adresave të shqiptarëve në këtë trevë, që është duke vazhduar ende nga institucionet qeveritare. Për pasivizimin e adresave, Mustafi thotë se Këshilli Kombëtar Shqiptar ka ndërmarrë masa dhe i është drejtuar institucioneve ndërkombëtare e kombëtare. Mustafi shprehet se nuk ka normalizim të marrëdhënieve mes Kosovës dhe Serbisë pa trajtuar problemin e shqiptarëve të Kosovës Lindore.[1]
- Me 24 maj, 2021, Kryeministri i Kosovës, Albin Kurti, ka thënë se është duke e përcjellë me vëmendje situatën e pasivizimit të adresave të shqiptarëve në Luginën e Preshevës.
“Kjo fushatë kundër banorëve shqiptarë të Luginës së Preshevës është e papranueshme dhe duhet të ndërpritet sa më parë”, citohet të ketë thënë Kurti gjatë një takimi me kryetarin e Këshillit Kombëtar Shqiptar në Serbi, Ragmi Mustafa.
Sipas një njoftimi të zyrës së kryeministrit Kurti, çështja e pasivizimit të adresave të banorëve shqiptarë të komunave me shumicë shqiptare, posaçërisht është intensifikuar në Medvegjë.
Në Serbi nuk ka numër të saktë të banorëve shqiptarë, pasi shqiptarët patën bojkotuar regjistrimin e popullsisë të bërë më 2011.
Çështjen e pasivizimit të adresave e kishte ngritur më herët edhe deputeti shqiptar në Parlamentin e Serbisë, Shaip Kamberi.
Ai i pati thënë Radios Evropa e Lirë në nëntor të vitit 2020 se ka vite që Serbia ka nisur pasivizimin e adresave të shqiptarëve që jetojnë në tri komunat jugore, në Preshevë, Medvegjë dhe Bujanoc dhe kjo sipas tij, po ndryshon “strukturën etnike” të këtyre komunave, që ndryshe njihen me termin Lugina e Preshevës.
“Po, ky është një proces që ka filluar para disa vjetësh. Më intensivisht është duke u zbatuar në Medvegjë në shqiptarët që në 99-tën janë larguar dhunshëm nga Medvegja dhe jetojnë në Kosovë, nuk e kanë të rregulluar statusin civil në Kosovë, që do të thotë se akoma janë shtetas edhe me vendbanim në Medvegjë. Por, në kuadër të ligjit për caktimin e vendbanimit po shfrytëzohet një dispozitë e cila thotë se nëse qytetari nuk është duke banuar në vendbanimin që e ka paraqitur, atëherë ai vendbanim pasivizohet. Këtu është fjala për pasivizimin e vendbanimeve”, pati thënë Kamberi.
Ai shton se qytetarëve të cilët iu pasivizohet adresa, mund të kërkojnë të regjistrojnë një vendbanim të ri, por ai shprehet se kjo bëhet përmes një procedure të stërzgjatur.
Ai shprehu edhe shqetësimin që shqiptarët që janë larguar nga Lugina e Preshevës drejt Kosovës që nga viti 1999, nuk e kanë të rregulluar statusin civil as në Kosovë.[2]
- 10 shtator 2023, Viola Von Cramon kërkon që BE-ja ta trajtojë më seriozisht çështjen e pasivizimit të adresave në Luginë.[3][4]
Shiko edhe
RedaktoReferime
Redakto- ^ Grejqevci, Fatmir (2021-07-31). "Ragmi Mustafi: Serbia po bën spastrim etnik nëpërmjet pasivizimit të adresave shqiptarëve në Kosovën Lindore". Radio Kosova e Lirë (në anglishte amerikane). Marrë më 2023-09-10.
- ^ "Kurti: Të ndalet fushata e pasivizimit të adresave në Luginë të Preshevës". Radio Evropa e Lirë. 2021-05-24. Marrë më 2023-09-10.
- ^ Koha, Gazete. "Von Cramon kërkon që BE-ja ta trajtojë më seriozisht çështjen e pasivizimit të adresave në Luginë". Koha.net.
- ^ BalkanInsight. https://balkaninsight.com/2021/03/25/eu-to-examine-whether-serbia-is-deleting-ethnic-albanian-addresses/.
{{cite news}}: Mungon ose është bosh|title=(Ndihmë!)