Shefqet Bruka

politikan shqiptar
Shefqet Bruka 1963 - jeton
Kryetar i Këshillit të Qarkut Kukës 2007-2011

Emri: Shefqet
Mbiemri: Bruka
Lindi më: 1 janar 1963
Vendlindja: Kukës
Profesioni: Politikan

BiografiaRedakto

Lindi në vitin 1963, në fshatin Resk të Ujmishtit në Kukës. Arsimin fillor e kreu në Ujmisht, ndërsa atë të mesëm në qytetin e Kukësit. U diplomua në Universitetin e Tiranës në vitin 1986, Fakulteti i Mjekësisë, dega stomatologji. Punoi fillimisht në poliklinikën e Kukësit, më pas u transferua në fshatin Kalis. Në janar të vitit 1991, iu bashkua Partisë Demokratike, ku u zgjodh përfaqësues i Ujmishtit.

Në vitin 1994 u zgjodh kryetar i degës së PD në Kukës, ndërsa pas zgjedhjeve vendore të 20 tetorit 1996, u zgjodh në krye të Këshillit të Rrethit Kukës. Mandati i tij rastisi me një ndër periudhat më të vështira në historinë e Kukësit, me trazirat që shpërthyen në mars të '97, dhe luftën e Kosovës në vitet '98-'99.

Si anëtar i këshillit të emergjencave bashkërendoi punën e Kombeve të Bashkuara me qeverinë shqiptare në dhënien e ndihmës ndaj refugjatëve të ardhur nga Kosova. Pas përfundimit të luftës propozoi kandidimin e Kukësit për çmimin Nobel për paqe. Në vitin 2000 si përfaqësues i Unionit të Drejtuesve të Pushtetit Lokal propozoi ndërtimin e rrugës Durrës-Kukës deri në kufi me Kosovën. Pas përfundimit të mandatit, punoi pranë disa organizatave ndërkombëtare.

Pas zgjedhjeve vendore të vitit 2007, Shefqet Bruka u zgjodh kryetar i Këshillit të Qarkut Kukës. Gjatë këtij mandati u vunë në zbatim disa projekte, si programi i zhvillimit ndërkufitar me Kosovën dhe Malin e Zi, përfundimi e përurimi i aeroportit të Kukësit, ndërtimi i rrugëve Kukës-Peshkopi dhe Kukës-Shishtavec, dhe grante të ndryshme në mbështetje të fermerëve, blegtorëve, dhe sektorit turistik.

Pas një pune 1-vjeçare për mbledhjen, përzgjedhjen dhe digjitalizimin e qindra hartave, Bruka shpalli zyrtarisht në qershor të vitit 2010 digjitalizimin e plotë të kadastrës së Qarkut Kukës, duke e kthyer këtë qark në të parin që ofronte këtë shërbim për qytetarët e vet. Ky projekt bëri jehonë, aq sa u bë shkak që në numrin e 14 janarit të vitit 2011 të revistës "Klan", Bruka të përzgjidhej si një nga 10 personalitetet e vitit 2010.

ReferimeRedakto

Lidhje te jashtmeRedakto

https://web.archive.org/web/20120306154239/http://www.qarkukukes.gov.al/