Shpresa Hoxha

Shpresa (Raça) Hoxha është studiuese dhe profesoreshë universitare nga Mitrovica.

Biografia

Shpresa lindi në Mitrovicë, Kosovë më 26 mars 1953. Shkollën fillore dhe gjimnazin i kreu në vendlindje. Studimet e gjuhës dhe të letërsisë angleze i regjistroi në Fakultetin e Filologjisë të Prishtinës, Katedra e gjuhës dhe e letërsisë angleze 1970-71 dhe diplomoi më 21 qershor 1974.

Më 4 qershor 1986 mbrojti me sukses punimin e magjistraturës me titull: “Funksionet e kohëve të shkuara të foljeve të anglishtes e të shqipes dhe përkthimi i tyre në romanin Oliver Tuisti të Ç. Dikensit, në Fakultetin e Filologjisë të Universitetit të Prishtinës. Temën e doktoraturës me titull Kontributi i William Martin Leake-ut në fushën e studimeve albanologjike e mbrojti po ashtu në Fakultetin e Filologjisë, Universiteti i Prishtinës më 25 qershor 2003. Që nga viti 1974 punon në Fakultetin Ekonomik të Universitetit të Prishtinës, mësimdhënëse e gjuhës angleze I & II edhe pas pensionimit në mars të vitit 2018.

Ka qenë e angazhuar në mësimdhënie në Fakultetin e Makinerisë (Inxhinierisë Mekanike) të Universitetit të Prishtinës, pas dëbimit të mësimdhënësve të UP nga pushteti serbosllav nga viti 1994-2005, në lëndën Gjuhë angleze I & II. Që nga viti 2005 është e angazhuar në Katedrën e gjuhës dhe të letërsisë angleze pranë Fakultetit të Filologjisë të UP. Është shpërblyer me shumë mirënjohje për punën e saj rreth 45 vjeçare në Universitetin e Prishtinës.

Ka botuar 66 punime shkencore, në mesin e tyre një monografi: Kontributi i W.M. Leake-ut në fushën e studimeve albanologjike dhe Fjalor fjalësh e shprehjesh turke të cilat përdoren në gjuhën shqipe. Në dy mandate ka qenë senatore e Universitetit të Prishtinës 2009-2012 dhe 2012-2015. Ndërsa në mars 2005 është zgjedhur Prodekane për çështje materiale në Fakultetin Ekonomik Prishtinë në periudhë 3 vjeçare; në shkurt 2016 Prodekane për shkencë në Fakultetin Ekonomik Prishtinë, detyrë të cilën e ushtroi deri në pension. Në maj 2010 u zgjodh Kryetare e Institutit “Alb-Shkenca” Prishtinë, Kosovë, dhe organizatore kryesore e Takimeve të mbajtura në Prishtinë, detyrë të cilën e mbajti deri në tetor të vitit 2019. Ka marrë pjesë në shumë konferenca vendore dhe ndërkombëtare në vend dhe jashtë si dhe ka kryer një varg aktivitetesh të ndryshme humanitare.

Shih edhe

• Instituti Alb-Shkenca