Edmond Tupja
Edmond Tupja është përkthyes dhe shkrimtar shqiptar, ka lindur në Tiranë në vitin 1947. Pasi kreu studimet në vendlindje, u diplomua për gjuhë e letërsi frënge në Universitetin e Sorbonës, Paris. Fillimisht pedagog në Fakultetin e Historisë e të Filologjisë, pastaj mësues në qytetin e Gramshit, më vonë përkthyes në Tiranë, sot drejton seksionin e përkthimit pranë departamentit të frëngjishtes në Fakultetin e Gjuhëve të Huaja të Universitetit të Tiranës. Autor tekstesh universitare, vëllimesh me poezi e prozë në shqip dhe frëngjisht, leksikograf, publicist e kritik përkthimesh, laureat çmimesh kombëtare e ndërkombëtare, ka shqipëruar vepra të shkrimtarëve francezë: Proust, Gracq, Tournier, Sartre, Giono, Mauroius, Pieyre de Mandiargues, Delerm, Plazy etj. dhe ka përkthyer në frëngjisht autorë shqiptarë si F. Kongoli, I. Kadare, D. Çomo, D. Çuli, B. Shehu dhe S. Çapaliku. Si shkrimtar, ai ka botuar disa tituj, shumë prej tyre me temë erotike. Përmendim këtu: “69 variacione për një temë erotike”, “Tingujt e trupit tënd” dhe “Fjalori erotik”. Ai është gjithashtu autor i veprave autobiografike “Mos ik, o ma” dhe “Kur dhimbja premton dashuri”. [1]
Botime
Redakto- Trotuaret e trishtimit - 1994
- Rërë e rëndë - 1999
- Këshilla një përkthyesi të ri - 2000
- Fjalor erotik i gjuhës shqipe : dhe të tjera "prapësi" pa aq të kripura (në mos më shumë) - 2004
- Tension i lartë - 2006
- Tingujt e trupit tënd - 2008
- Kur dhimbja premton dashuri - 2009
- Mos ik, o ma - 2010
- 69 variacione për një temë erotike - 2011
- Lufta e fjalorëve - 2012
- Vajzat e ballkonit - 2014
- Album i brengës më të thellë - 2015
- Po shkoj të kap Enisin - 2016
- Fjalor erotik frutash, lulesh e perimesh - 2017
- Kujtimet e një karrigeje - 2019