Lokaliteti arkeologjik në Hisar të Suharekës
Lokaliteti arkeologjik në Hisar të Suharekës është një vendbanim shumështresor dhe si i tillë monument i trashëgimisë kulturore i cili ndodhet në Hisar të Suharekës, Kosovë.[1] Ky monument është i kategorisë "Arkeologjik", i miratuar me numër 02.-459/58.
| Lokaliteti shumështresor në Hisar | |
|---|---|
| Lloji | Arkeologjike |
| Vendndodhja | Hisari i Suharekës, Kosovë |
| Ndërtuar | Parahistori |
| Emri zyrtar: Lokalitet Arkeologjik / Rezervat | |
| Lloji | Nën mbrojtje |
| Përcaktuar | 02.-459/58 |
| Nr. i referencës | 2996 |
Historiku Redakto
Lokaliteti arkeologjik shumështresor, përkatësisht vendbanimi prehistorik i Hisarit, ndodhet në pjesën jugperëndimore të qytetit të Suharekës, i vendosur në një pllajë që dominon në terrenin më të gjerë të sheshtë të anës veriore, i vendosur midis Suharekës në veri dhe Shirokës në jug, në anën e djathtë të rrugës Suharekë - Prizren. Tarraca është një zonë e rrafshët eliptike me diametër 180 x 90 m dhe me një sipërfaqe totale prej afërsisht 1,1 ha, me lartësinë mbidetare të regjistruar 422 m (mbi nivelin e detit). Gërmimet e para arkeologjike u kryen në disa etapa; 1961–1963, 1978 dhe përsëri pas dy dekadave e gjysmë, Instituti Arkeologjik i Kosovës vazhdoi në dy sezone 2003 dhe 2004. Materiali arkeologjik i zbuluar i regjistruar në këtë vend gjatë gërmimeve, shtrihet nga Neoliti i Vonë duke vazhduar deri në Epokën e Hekurit, dhe ofron një përmbledhje për studimin e kulturës materiale të popullatës autoktone dardane. Hisari paraqet një civilizim parahistorik shumë të rëndësishëm jo vetëm për Kosovën, por edhe për të gjithë Ballkanin. Lokacioni është provë e një qyteti të lulëzuar nga Epoka e Bakrit.[2] Nga njëmbëdhjetë shtresat stratigrafike më e hershmja është nga Epoka e Neolitit të vonë, duke vazhduar si një vendbanim deri në shtresën e quajtur Hisar VI të Antikitetit të Vonë (shekujt IV - VI es). Sipas kësaj skeme kronologjike, faza më e hershme e vendbanimit në Hisar duhet të lidhet me fazën Reshtan të Neolitit të Vonë të Adriatikut. [3]
Shih edhe Redakto
Referime Redakto
- ^ LISTA E TRASHËGIMISË KULTURORE PËR MBROJTJE TË PËRKOHSHME (PDF). Republika e Kosovës, Ministria e Kulturës, Rinisë dhe Sportit. Marrë më 17 gusht 2016.
- ^ Berisha, Milot (2012). "Archaeological Guide of Kosova" (PDF) (në anglisht). Archaeological Institute and Ministry of Culture, Youth and Sports. fq. 36. Arkivuar nga origjinali (PDF) më 17 prill 2019. Marrë më 18 shtator 2020.
- ^ Përzhita, Luan, etj. (2006), "Harta Arkeologjike e Kosovës (1)", academia.edu, Prishtina: Akademia e Shkencave dhe e Arteve e Kosovës & Akademia e Shkencave e Shqipërisë, fq. 30
Lidhje të jashtme Redakto
- Databaza e trashëgimisë kulturore të Kosovës Arkivuar 26 mars 2016 tek Wayback Machine