Ernest Koliqi

shkrimtar shqiptar

Ernest Koliqi (Shkodër, 20 maj 1903 - Romë, 15 janar 1975) ishte poet, romancier, eseist, përkthyes, gazetar, dramaturg, mësues dhe botues shqiptar. Lëvroi tregimin modern shqiptar,[1][2], me përmbledhjet Hija e Maleve (1929), Tregtar flamujsh (1935) dhe Pasqyrat e Narçizit (1936). Themeloi të përkohsmen "Shejzat" në Romë.

Ernest Koliqi
Ernest Koliqi.jpg
Ministër i Arsimit
12 prill, 1939 – 1 korrik, 1941
Paraardhësi: Pertef Pogoni
Pasardhësi: Xhevat Kortsha
Kryetar i Këshillit të Epërm Korporativ Fashist
23 nëntor, 1942 – 16 maj, 1943
Paraardhësi: Terenc Toçi
Pasardhësi: Fejzi Alizoti
Të dhënat personale
Lindi më: 20 maj, 1903
Lindi në: Shkodër", Perandoria Osmane
Vdiq më: 15 janar, 1975
Vdiq në: Romë, Itali
Kombësia: Shqiptar
Profesioni: mësues, ministër, pedagog, botues
Bashkëshortja Vangjelije Vuçani
Fëmijë Marku, Elizabeta

JetaRedakto

Vite të hershmeRedakto

U lind në Shkodër. Qe i biri i Shan Koliqit dhe i Ages së Cuk Simonit, [3] nga familje reshpere shkodrane fort e kamur. Familja e tij kishte origjinën prej Lotajve të Shalës së Dukagjinit, e rënë në krahinën e Anamalit rreth vitit 1700 së pari, e pastaj në Shirokë. Prej një të pari i mbeti nofka Kolaj, të cilës iu vendos prapshtesa -iqi prej tregtisë të vazhdueshme me Malin e Zi.[4] Ishte i dyti ndër fëmijët, mbas Mikelit - që do të bëhej i pari kardinal shqiptar - dhe mbas tij vinin Leci, Guljelmi, Margerita, Antonjeta, Viktori dhe Terezina.[5]

Pas mësimeve të para në Kolegjin Saverian të Jezuitëve, i ati e dërgoi për të studiuar në Itali më 1918.[1] Së pari në kolegjin jezuit "Cesare Arici" në Breshia dhe pastaj në Bergamo. Bashkë me nxënës të tjerë hap gazetën “Noi giovani” (shq.: “Ne të rinjtë”), ku boton poezitë e para në italisht. Kthehet në Shqipëri pasi që gjendja futet në hulli pas Kongresit të Lushnjës, mëson shqipen dhe falë njohjes me Luigj Gurakuqin njihet me rininë premtuese: Thaçi, L. Ashiku, Shuk e Karl Gurakuqi, Dom Shantoja, Kolë e Gjon Kamsi. Më 1921 mbahet një konkurs për himnin kombëtar, ku Ernesti merr pjesë me një poezi e cila fitoi çmimin e parë, të dhënë nga juria e përbërë prej Fishtës, Nolit, Frashërit e Gurakuqit.[1]

Në mars-prill merr pjesë si përfaqësues i shoqërisë kulturore "Rozafa" në një mbledhje me Zef Harapin nga shoqëria "Bogdani" dhe P. Harapin në takimin që formoi grupimin "Ora e Maleve" nën dorën e Imzot Mjedjës.[6] Mbas Lëvizjes së qershorit, Gurakuqi e thërret në Tiranë si sekretar personal. Aderon në shoqërinë "Bashkimi" të themeluar prej të shuarit Rustemi, e drejtohej tashmë nga Zai Fundo. Kalon më pas si sekretar në Ministrinë e Mbrendshme, ku ministër ishte kolonel Shala.[7]

Mes mërgimit dhe ShqipërisëRedakto

Me rithimin e Zogut në pushtet në dhjetor të 1924, shtrëngohet të dalë në mërgim. Doli në veri drejt Mbretërisë Serbo-Kroate-Sllovene, ku studioi gjuhën dhe letërsinë serbo-kroate. Qëndron për dy vjet në TuzlaBosnjës.[8][9] Më 1928 gjendet në Bari të Italisë. Në Zara të Dalmacisë boton më 1929 përmbledhjen e parë me novela Hija e Maleve.[7] Kthehet në Shqipëri dhe nis punë si mësues në Shkollën Italiane Tregtare në Vlorë dhe mandej në Gjimnazin e Shkodrës (1930-'33)[10], ku mes të tjerëve do t'iu jepte mësim Petro Markos[11] gjegjësisht nëpër qytetet e përmendura. Nis të verojë ndër bjeshkët e Dukagjinit ata vite ku përpos ndodhive shënonte edhe kangët e buta - siç i thonë në Dukagjin këngëve erotike - kujtime të cilat do t'i shkruante mbas '70 me pseudonimin "Hilushi". Ndërkohë miku i tij Kruja i kërkon me mbledhë librat e bibliotekës së tij të cilat qenë shpërndarë ndër françeskanë e jezuitë mbas lëshuan Shqipërinë në dhjetorin e 1924.[12]

Më 1933 jep dorëheqjen nga mësimdhënia për të nisur studimet universitare në Padova. Gjatë periudhës 1934-'36 ishte pjesëtar i grupit botues të të përkohshmes "Illyria" [13] ku do të botonte poemthin në prozë Quattuor. Në po të njëjtën të përkohshme më 1935 do të zbulohej Migjeni me vjershën "Të lindet Njeriu" me nxitje të Koliqit.[14] Më 1936 e emërojnë Lektor të Shqipes në katedrën e Albanologjisë të drejtuar nga gjuhëtari Tagliavini. Më 1937 doktoron po në Padova me tezën “Epica popolare albanese” (“Epika popullore shqipe”) falë mbledhjeve që kishte bërë P. Palaj, tezë doktorate e cila u vlerësua nga shumë albanologë si Jokli, Lambertz etj.[1] Transferohet nga Padova në Romë tetorin e 1937 si lektor i gjuhës shqipe.[14]

Ministër Arsimi nën pushtimin italianRedakto

Pas pushtimit fashist të Shqipërisë në prill 1939, Ernest Koliqi u emërua Ministër i Arsimit në qeverinë kolaboracioniste të Shefqet Vërlacit, e cila pak kohë më vonë do t'i shpallte luftë Francës dhe Britanisë së Madhe.[15][16] Reputacioni i Koliqit u dëmtua shumë për shkak të bashkëpunimit të tij me pushtuesin italian, sidomos në mesin e simpatizantëve të tij të rinj. Paguhej privatisht nga ministri i jashtëm i Italisë fashiste, Konti Çiano, fakt që nuk dihej në atë kohë.[17] Kësodore Çiano e shpërbleu me titullin profesor në Universitetin e Romës.[18] Koliqi mbylli pothuajse të gjitha shkollat e huaja joitaliane në Shqipëri. Liceu francez në Korçë, i cili ishte qendra kryesore e kulturës frënge në Shqipëri, u mbyll me arsyetimin e Koliqit se ishte çerdhe e përhapjes së ideve armiqësore ndaj sistemit fashist.[19]

Gjatë kohës sa qe ministër i arsimit, u bënë ndryshime në programet dhe tekstet shkollore; u futën lëndë të reja si: edukata fashiste, mësimi i fesë dhe kulturës romake, ndërsa gjuha italiane u bë e detyrueshme. Shkollat e mesme u mbushën me mësues dhe drejtues italianë, kurse drejtuesit shqiptarë pak nga pak u mënjanuan.[20] Për të përforcuar kontrollin e fashistëve mbi shkollën, ministri Koliqi në tetor 1939 propozoi që emërimet e mësuesve dhe të drejtuesve të shkollave të kalonin nëpër filtrin e Partisë Fashiste.[21] Në një qarkore të 11 korrikut 1940, ministri Koliqi i urdhëronte të gjitha drejtoritë e shkollave të Shqipërisë që mësuesit dhe nxënësit të lidheshin me Partinë Fashiste.[22][23] Me 25 korrik 1940, në një qarkore tjetër të Koliqit u urdhëruan drejtoritë e shkollave dhe inspektorët e arsimit që të digjnin dhe shkatërronin të gjithë librat, broshurat dhe botimet tjera që kishin të bënin me regjimin e mbretit Zog, si dhe bustet e këtij të fundit.[24]

Me Mustafa Krujën dhe P. Valentinin thirri në Tiranë Kongresin Ndërkombëtar të Studimeve Shqiptare në vitin 1940. Themeloi e drejtoi të përkohshmen “Shkëndija” në korrik të 1940. Në shtatorin e vitit 1941 nis mbi 200 arsimtarë normalistë drejt Tokave të lirueme.[25][26] Në një letër dërguar më 16 tetor 1941 nga ministri i arsimit të Qeverisë së atëhershme shqiptare Ernest Koliqi konsullit shqiptar Rrota në Vjenë thuhet se ka angazhuar Joklin si organizator të bibliotekave të Shqipërisë me një rrogë mujore prej 600 frangash ari. Përpjekje kjo, si shumë të tjera për ta shpëtuar studiuesin e shumëçmuar, që nuk dha rezultat.[27][28]

Koliqi është quajtur eminenca gri e Italisë në Shqipëri.[29]

Kryetar i Institutit të Studimeve ShqiptareRedakto

Në funksion të edukimit fashist, u krijua fondacioni "Skënderbeu", në gjirin e të cilit u mblodh Instituti i Studimeve Shqiptare. Me propozim të Koliqit në të u mblodhën emra të njohur të kulturës dhe shkencës, shqiptarë dhe italianë, si dhe ideologë fashistë të kohës.[30] Ministria e Arsimit në qeverinë pasardhëse Kruja pati si pasues Xh. Kortshën. Duke dhënë dorëheqjen, Koliqi kësodore i përkushtohet drejtimit të Institutit, prej ku filloi botimi i vëllimeve "Studime e tekste". Martohet me arsimtaren Vangjelije Vuçani dhe patën dy fëmijë: Markun dhe Elizabetën. Në zgrip e kapitullimit të Italisë fashiste, më 1942 zëvendëson Terenc Toçin në krye të Këshillit të Epërm Korporativ Fashist deri më 1943.[31] Në vjeshtën e 1943 prej portit të Tivarit shkon në Itali me familjen dhe të afërmit e tij.[32]

Mërgimi i mbramë, BKI dhe "Shêjzat"Redakto

Më 1943 vajti në Romë të vazhdonte punën si ordinar në universitet dhe u emërua ambasador në Vatikan. Nga një telefonatë merr vesh për kapjen e P. Markos nga ana e gjermanëve, të cilit i shpëton jetën.[11] Më 6 nëntor 1946 krijohet partia Blloku Kombëtar Indipendent me bërthamën krijuese e drejtuese të përbërë nga vetë Koliqi, dr. Ismail Vërlaci, Gjon Marka Gjoni dhe Ndue Gjon Marku - duke i ndenjtur veprës së Mark Gjon Markut.

Kur Enver Hoxha i prishi marrëdhëniet me Jugosllavinë në 1948, përfaqësuesit e "nacionalizmit" në mërgim, mes të cilëve edhe Ernest Koliqi, i dërgonin letra Josip Broz Titos me anë të të cilave e ftonin atë ta sulmonte Shqipërinë, ta rrëzonte Enver Hoxhën dhe t'ua linte vendin atyre. Ata i premtonin Titos se Shqipëria e tyre do të ishte mike besnike e Jugosllavisë.[33]

Në mars të 1947 themelon dhe kujdeset të botojë të përkohshmen “L’Albanie Libre” që ndali më 1959, e më pas “Lajmëtari i të Mërguemit”.[34]

Në Itali, themelon të përkohshmen “Shêjzat” (it. “Le Pleiadi”) që e drejtoi për 18 vjet. “Shejzat” qe vijimësi e traditës publicistike që la në Shqipëri me "Shkëndijat", penat e hershme dhe ato të reja gjetën vend ku të kultivonin kulturën shqiptare në Itali. Koliqi ndihmoi talente të shumë fushave të ikur nga ish-Jugosllavia duke iu dhënë hapsirë ndër faqet e revistës, ndër ta piktori Lin Delija, shkrimtarët Martin Camaj e F. Karakaçi dhe etnologu V. Malaj.[32] Me dekret të Presidentit të Republikës së Italisë, më 2 shtator 1957, për njohje të prestigjit, Katedra e Gjuhës dhe e Letërsisë Shqipe e Universitetit të Romës, nderohet duke u bërë Institut i Studimeve Shqiptare dhe Koliqi u emërua presidenti.

Më 4 maj të 1969 i vdes bashkëshortja Vangjelija. Vdekja e saj i shkaktoi një mungesë të pazëvëndësueshme e shpejtoi edhe vdekjen e tij. Koliqi vdes në shtëpinë e tij në Romë më 15 janar 1975 dhe u varros me datën 18. Në ceremoninë e asaj dite kishin ardhur personalitete të ndryshme, kolegë, shqiptarë, arbëreshë, miq të ardhur nga vende të ndryshme.[1]

VepraRedakto

PoeziRedakto

Megjithëse poezitë e para i shkroi në italisht në fletoren e liceut, vepra e tij e parë qe poemthi dramatik Kushtrim i Skanderbegut, të cilin ia kushtoi shokëve të shoqërisë "Bashkimi" pjesë e të cilëve ishte edhe ai vetë. Poemthi artikulon idetë kombëtare të autorit që shtjellon një dialog për të kaluarën dhe aktualitetin e kohës në Shqipëri. Me veprën poetike Symfonija e Shqipevet mëton të evokojë kulturën si esencën e themelimit të një kombi, kulturë e evokon që nga thellësitë e antikitetit në katër kohët e veprës.[35] Kangjelet e Rilindjes është një poemë e kënduar në shtatë pjesë, me temër arbëreshe e krijuar me idetë rilindëse duke iu referuar Këngëve të MilosaosDe Radës. Në këtë poemë autori kërkon të dëshmojë se si ruhet veçantia arbërore në kohë, edhe e shkëputur nga trungu, përmes arbëreshëve të Italisë.

Vepra poetike më me preteza letrare e Koliqit është Gjurmat e Stinve, botuar më 1933. Në këtë vepër kërkon të manifestojë vetëdijen e vet poetike në kohën e pjekurisë, i këndon Tingëllimit, por edhe i kushton tingëllime të ndjera qytetit ku kish lindur.[36]

ProzëRedakto

Kulmin e vet letrar e arrin me librat e tregimeve Hija e Maleve (1929), Tregtar flamujsh (1935) dhe Pasqyrat e Narçizit (1936); me këta tituj u bë themeluesi i prozës moderne shqipe qoftë në nivel tematike, ashtu edhe stili. Libri i parë trajton tema për moralin e Malësisë, tragjiken e vet dhe mpleksjen me mjedisin qytetar, i dyti merret më shumë me jetën në mjedisin qytetar shkodran, mendësia, karakteret dhe paraqitje ironike të tipareve sociale të mjedisit qytetar; i treti është një biografi poetike e autorit me shtresëzim të shkollës simboliste.[37]

Më 1960 botoi romanin "Shija e bukës së mbrûme”, që flet për nostalgjinë e emigrantëve.[38]

PërkthimeRedakto

Më 1932 vëllimin e parë të antologjisë “Poetët e mëdhenj të Italisë” me parathënie të Fishtës, një antologji me 280 faqe që u përdor menjëherë si tekst letërsie në gjimnazin klerik të Shkodrës dhe përmban katër poetët më të mëdhenj të Italisë: Danten, Petrarkën, Arioston, Tason. Më 1935 Boton vëllimin e dytë të antologjisë “Poetët e mëdhenj të Italisë” me parathënie nga Tagliavini, ku përfshiheshin vjersha të përkthyera të katër italianëve të tjerë: Parini, Monti, Foskolo, Manxoni. Personalisht çmonte Giosuè Carducci, Giovanni Pascoli, dhe Gabriele D'Annunzio-n.[39]

Më 1961 nis të përkthejë Lahutën e Malcís në italisht, përkatësisht këngën XXVI, më tej më 1971 përktheu këngët XII-XIII-XIV dhe XV; më 1973 vazhdon të përkthejë pjesë të Lahutës.

StudimetRedakto

Nis të botojë nga viti 1954 deri më 1961, studimin krahasues “Dy shkollat letrare shkodrane - e Etënve jezuitë dhe e Etënve françeskanë”. Në këtë studim të tij vërehet përpjekja për të hartuar një histori të mirëfilltë të letërsisë shqiptare, jashtë ngjyrimeve ideologjike. Në Firenze boton vëllimin “Poesia popolare albanese”(“Poezia popullore shqiptare”) ku spikat si studiues i merituar i traditave artistike dhe folkloristike të atdheut të tij. 1959 - Boton vëllimin “Kangjelet e Rilindjes” (“I canti della Rinascita”) me përkthimin në italisht, kushtuar arbëreshëve të Italisë, ku i nxit ata të ruajnë gjuhën e zakonet e të kenë besim në pavdekësinë e fisit. Boton studimin “Gabriele D’Annunzio e gli Albanesi” (“Gabriel D’Anuncio dhe Shqiptarët”). 1963 - Boton “Antologia della lirica albanese” (“Antologjia e lirikës shqiptare”) ku për herë të parë paraqiten në një gjuhë evropiane përkthimet e lirikat më të mira të autorëve shqiptarë të vjetër e të rinj ku theksohen autorët kosovarë me qëllim që të njihen më mirë. 1965 - Del në dritë “Albania”, një monografi italisht, botuar në “Enciclopedia dei popoli d’Europa”, Milano ku paraqet një pasqyrë të gjërë mbi Shqipërinë si në pikëpamjen gjeografike, ashtu edhe letrare e historike.

Më 1983, historia e letërsisë shqipe i referohet pasivisht si "Koliqi tradhëtari" për shkak të bashkëpunimit me fashizmin.[38]

PublicistikëRedakto

Qe themelues dhe drejtues revistash, ku botohej e trajtohej letërsia e kultura shqiptare si: Ora e Maleve, Shkëndija, Shêjzat, etj.[39] Bashkëpunoi me revistat “Hylli i Dritës” e françeskanëve, “Leka” e jezuitëve, “Përpjekja shqiptare” e Branko Merxhanit , “Minerva”, “Besa” etj.

MirënjohjeRedakto

  • Medalje ari e Shoqnís “Dante Aligheri”
  • Ylli i artë për Meritë të Shkollës
  • Akademik ordinar i Akademisë Tiberiane
  • Akademik Nderi i Akademisë Teatine të Kietit për Shkencat
  • Anëtar i Akademisë së Abrucit për Shkencat dhe Artet
  • Anëtar efektiv i Akademisë së Mesdheut.
  • Anëtar Nderi i Qendrës Ndërkombëtare për Studimet shqiptare.
  • Medalja e Artë e Lidhjes së Prizrenit Kosovë

LiteraturaRedakto

  • Fischer, Bernd Jürgen (1999). Albania at War, 1939-1945. C. Hurst & Co. Publishers. ISBN 978-1-85065-531-2.
  • Milo, Paskal (2014). Shqiptarët në luftën e dytë botërore. Toena.

ReferimetRedakto

  1. ^ a b c d e Vuçani P. (1975). "Jeta dhe veprat e Koliqit". "Shêjzat" - Numër përkujtimuer kushtue prof. Ernest Koliqit: 14–18..
  2. ^ Hamiti, Sabri (2013). Letërsia moderne shqipe. Tiranë: Uet press. f. 413. ISBN 9789995639457.
  3. ^ Camaj M., Fjala qet fjalën - Në rasën e gjashtëdhetëvjetorit të lindjes së Ernest Koliqit, "Shêjzat",
  4. ^ Hamdi, Bushati (1999). Shkodra dhe motet: (traditë, ngjarje, njerëz...). Shkodër: Idromeno. f. 202.
  5. ^ Demo, Elsa. "Viktor Koliqi i fshehti dhe i ndjeshmi vëlla shkrimtar: "Hylli i Dritës" rizbulon pas gjysmë shekulli vëllain shkrimtar të Ernest Koliqit". Shekulli. Tiranë: Shekulli. - Nr. 2529, 22 janar, 2009: 20 - 21. Është injoruar "year 2009" (Ndihmë!); Shiko vlerën e |authorlink= (Ndihmë!); Mungon ose është bosh parametri |language= (Ndihmë!)
  6. ^ Çefa K., Grupi "Ora e Maleve" dhe publicistika e tij, Tiranë: "Gjergj Fishta", 2013. ISBN 978-9928-161-21-5
  7. ^ a b Oroshi J. (1975). "Një pishtar i letërsisë e i kulturës shqiptare fiket". "Shêjzat" - Numër përkujtimuer kushtue prof. Ernest Koliqit: 57–65..
  8. ^ Karl Gurakuqi (1963). "Ernest Koliqi". "Shêjzat", VII (nr. 5-8): 163–172..
  9. ^ Hilushi, Kuleta e vjetër me guraleca të ngjyershëm, Romë: "Shêjzat" vj. XVI, nr. 01-04, fq. 89.
  10. ^ Koliqi E., Dante e ne shqiptarët (1950), Tiranë: Tirana observer. - Nr. 21, 27 janar, 2008, f. 9.
  11. ^ a b Marko, Petro (2000). "Intervistë me vetveten". Tiranë: "Omsca"..
  12. ^ Koliqi E. (1973). "Mustafa Kruja si njeri kulture e si gjuhëtar". "Shêjzat" - botim përkujtimor për Mustafa Krujën. Romë..
  13. ^ Logoreja, Anton (1975). "Ernest Koliqi". "Shêjzat" - Numër përkujtimuer kushtue prof. Ernest Koliqit: 142–144.
  14. ^ a b Koliqi E., Migjeni dhe unë, Romë: "Shêjzat", v. XVIII nr. 1-10, 1974. fq
  15. ^ Fischer 1999, p. 37.
  16. ^ Milo 2014, p. 95.
  17. ^ Fischer 1999, p. 37.
  18. ^ Fischer 1999, p. 40.
  19. ^ Fischer 1999, p. 51.
  20. ^ Akademia e Shkencave e Shqipërsië (2008). Historia e popullit shqiptar: vëllimi i katërt. Toena. f. 28.
  21. ^ Milo 2014, p. 72.
  22. ^ Milo, Paskal (2014). Shqiptarët në luftën e dytë botërore. f. 60.
  23. ^ Milo 2014, p. 60.
  24. ^ Milo, Paskal (2014). Shqiptarët në luftën e dytë botërore. f. 67.
  25. ^ Letër nga Ernest Koliqi dërguar Karl Gurakuqit, Romë, 16–3–1951.
  26. ^ Krasniqi, Rexhep (1975). "Ernest Koliqi dhe zhvillimi letrar në Kosovë". "Shêjzat" - Numër përkujtimuer kushtue prof. Ernest Koliqit: 36–42. Shiko vlerën e |authorlink= (Ndihmë!).
  27. ^ Maksuti I., Norbert Jokl - Figurë e shquar e albanologjisë, Illyria. - V. 12 Nr. 1150, 21-24 qershor, 2002, f. 30.
  28. ^ Ndreca, Ardian (2012). "Norbert Jokl dhe fati i një biblioteke që i përkiste Shqipnisë". Mapo. - Nr. 527, 8 mars. Tiranë: 10..
  29. ^ Fischer 1999, p. 37.
  30. ^ Milo 2014, p. 73.
  31. ^ Muner P., Ku e lamë Koliqin?, Tiranë: Revista Klan, 24 qershor 2013.
  32. ^ a b Ndreca A., Në përvjetor të Ernest Koliqit, mapo.al, 18 maj 2013.
  33. ^ Xhufi, Pëllumb (15 shkurt 2017). "A ishte Enver Hoxha një komunist nacionalist?". Gazeta Dita. Marrë më 12 shkurt 2018.
  34. ^ Gurakuqi R., Ernest Koliqi dhe Blloku Kombëtar Indipendent, Shkodër, 2004.
  35. ^ Hamiti 2013, p. 393.
  36. ^ Hamiti 2013, pp. 394-396.
  37. ^ Hamiti 2013, p. 398.
  38. ^ a b Robert Elsie (2010). Historical Dictionary of Albania. Londër: Rowman & Littlefield. ff. 235–236.
  39. ^ a b Hamiti 2013, p. 391.