Dragobili

Dragobili është një vendbanim në komunën e Malishevës, Kosovë. Gjendet rreth 4 kilometra në jugperëndim të qytetit, në anën e majtë të rrugës rajonale Malishevë-Rahovec dhe është vendbanim kodrinor i tipit të dendur.

Dragobili Dragubil
Fshat
Shteti	Kosova
Komuna	Malishevë
Rajoni	Rajoni i Prizrenit
Sipërfaqja
• Gjithsej	5,9 km2 (23 sq mi)
Lartësia mbidetare	606 m (1,988 ft)
Popullsia
• Gjithsej	1.348 banorë
Targat	04

Fshati ka shkollën nëntëvjeçare, xhaminë, objektin shëndetësor, zyrën e ofiçarisë, disa dyqane tregtare, biznese zejtare dhe prodhuese. Është me kushte të përshtatshme për zhvillimin e bujqësisë, blegtorisë dhe pemëtarisë, andaj edhe të ardhurat sigurohen nga këto veprimtari, nga diaspora dhe nga veprimtaritë zejtare e shërbyese.

Historia

Te vendi që quhet Arat e Kishës, te Goleshi, afër Malishevës, ka ekzistuar një kishë e vjetër parasllave, ndërsa te vendi Vnesht Tona, në drejtim të Malishevës ka pasur mbeturina të hardhisë së rrushit dhe janë zbuluar themele të shtëpive. Për herë të parë në dokumentet e shkruara përmendet në vitin 1394-1395, ku një logotet Lluka ia kishte dhënë dhuratë Manastirit të Malit të Shenjtë, ndërsa kontesha Milica me djemtë e saj e vërteton këtë dhuratë.

Përmendet pastaj në defterin e Sanxhakut të Shkodrës të vitit 1485, me këtë emër dhe kishte 6 shtëpi. Ky vendbanim një kohë nuk gjendet i dokumentuar, ndoshta ka qenë i braktisur ose është llogaritur në kuadër të ndonjë vendbanimi më të madh afër, mirëpo, thuhet se kur familja Paçarizi ka ardhur nga Loxha e Pejës në shekullin e 18-të, e ka gjetur aty familjen e Tredhakëve.

Në sallnamet e Vilajetit të Kosovës, të viteve 1893, 1896, dhe 1900 është i regjistruar si vendbanim me shënimet përkatëse. Në vendin e quajtur Pallankë, në kuadër të këtij vendbanimi që gjendet ndërmjet fshatrave Dragobil, Mirushë, Burim, dhe Malishevë qenë vendosur dhe kanë jetuar disa familje kolone sllave, kryesisht malazeze. Rreth vitit 1956, nga ky vendbanim, dy familje të Tredhakëve ishin nisur për t'u shpërngulur në Turqi, por kanë mbetur në Shkup.

Familjet dhe mikrotoponimet

Familjet kryesore në Dragobil janë: Paçarizi dhe Tredhaku (të fisit Morinë), kurse mikrotoponimet më karakteristike janë: Fusha e Sharrakuqit, Goleshi, Ulza, Kodra, Arat e Begut, Bogëza, Smonica, Arat e Qukit, Rrahishtat, Arat e Kishës, Lugu i Bezbetiqit, dhe Vnesht Tona.

Demografia

Popullsia sipas viteve

Viti i regjistrimit	Numri i popullsisë	Numri i shtëpive
1913	339	-
1921	243	30
1948	310	41
1953	348	41
1961	441	40
1971	656	56
1981	840	70
1998	1360	130
1999	1348	149

Koha e Luftës së Kosovës

Popullata e këtij vendbanimi ishte dëbuar gjatë ofensivave serbe të pranverës së vitit 1999. Në këtë fshat ishte i vendosur Shtabi i Brigadës së UÇK-së 112 (në shtëpinë e Shaqir Paçarizit) dhe Batalionit 1 dhe 2 të Dragobilit. Në shtëpinë e Isuf Paçarizit, nga muaji gusht 1998 deri më 29 mars 1999 ka qëndruar dhe Misioni vëzhgues diplomatik amerikan KODOM. Këtu kamë qëndruar diplomatët Hili, Petriqi, Walker-i, etj.. Shef i zyrës është Shan Bers. Ndërsa, në odën e afërt janë bërë përgatitjet dhe nga këtu kanë shkuar përfaqësuesit e UÇK-së në Konferencën e Rambujesë.

Gjatë viteve 1998-99 janë djegur e dëmtuar të gjitha shtëpitë e fshatit. Është djegur zyra e vendit dhe është dëmtuar ndërtesa e shkollës fillore dhe një pjesë e dokumentacionit të saj. Nga ky vendbanim kanë rënë 6 dëshmorë dhe 37 martirë. Më 29 mars 1999, popullata ishte dëbuar nga fshati prej pushtetit serb.

Lidhje të jashtme

• vendndodhja

Komuna e Malishevës

Qyteza: Malisheva dhe fshatrat:

Astrazupi | Balinca | Banja | Bellanica | Berisha | Bubaveci | Bubli | Carrallugë | Carravrana | Damaneku | Dragobili | Gajraku | Garaçeva | Golluboci | Guriqi | Jançishti | Joviqi | Kërvasari | Kijeva | Lubizhda | Lladroci | Lladroviqi | Llapçeva | Llashkadrenoci | Llazica | Magjera | Millanoviqi | Maralia | Mirusha | Mleçani | Ngucati | Pagarusha | Panorca | Pllaçica | Qypeva | Ruda | Seniku | Shkarashniku | Temeçina | Tërpeza | Tërpeza e Poshtme | Turjaka | Vërmica